ستوب موشن إسرائيلي ............ بقلم : الخيط

من فترة مش بعيدة اتفرجت على فيديو كليب لأغنية معمول بالتقنية المستخدمة في بعض افلام الكرتون , المهم عجبني جدا الفيديو كليب ده وابتديت أدور على التقنية دي وبتتعمل ازاي ومين اللي عمل الفيديو كليب ده, واكتشفت ان المغني والمؤلف والمصور والموديل وكل اللي اشترك في الكليب - اسرائيلي- فا أول حاجة جات على بالي إني أقفل الكليب وما اتفرجش عليه تاني بس فكرت شوية قبل ما أعمل الموضوع ده, وقلت لنفسي طب ليه ما أستفيدش منه بدل ما أقفله, بمعنى الكليب معمول باسلوب حلو وفيه فكرة حلوة ليه أنا ما أستفيدش منها ومن فكرته وأعمل حاجة مفيدة أو فكرة زيها وتكون أحسن منها.

طبعا بطبيعتنا كمصريين فيه عداء بينا وبين اسرائيل من زمان ودلوقت وحيفضل على طول موجود بحكم إنهم أخدوا أرضنا ودخلوا في حرب معانا في 67 , وبحكم اللي بيعملوه في فلسطين فبالتأكيد أنا ضد قتل الاطفال والسيدات بوحشية وفي نفس الوقت أنا ضد إن طيارة تدخل في مبنى وتقتل مئات الأشخاص الأبرياء اللي منهم أب أو أم نزلوا شغلهم الصبح وكانو فاكرين إنهم هيرجعو لأسرهم آخر النهار وبرضه أنا ضد إن واحد يفجر نفسه ويخلي أسرته تخسره وتزعل عليه علشان يموتله تلات أربع عساكر يهود , موتهم لا حيقدم ولا حيأخر ولا حيحرر البلد بالعكس دا هو لو فضل عايش وحارب بسلاح او درس وطلع مهندس أو طبيب حيكون أفيد لبلده وأسرته , وبرضه أنا ضد تصدير واستيراد السلع مع اسرائيل بس قبل ما نقول ما نصدرش وما نستوردش ليه ما نتعلمش منهم ونبقى أحسن منهم, على سبيل المثال بلد زي اسرائيل داخلة في حروب مع طوب الأرض لبنان وفلسطين وقديما مصر وعايشة في حالة توتر دائم ورغم كده عندهم اقتصاد ممتاز وزراعة والحالة عندهم كويسة في حين إن مصر المفروض انها مستقرة من الناحية العسكرية ورغم كده تلاقي اقتصادها تعبان والظروف صعبة فيها.

الحرب دلوقت ما بقتش سلاح ودبابات وجيش بالعكس دي حرب اقتصادية يعني اسرائيل مسيطرة على امريكا بالاقتصاد وامريكا مسيطرة على باقي الدول برضه بالاقتصاد , يبقى قبل ما أقول ما نستوردش وما نصدرش وما نعملش لازم الأول نتعلم منهم علشان نغلبهم , زي أغلب العلوم اللي كانت عند الفراعنة واللي أخدتها اوروبا وامريكا وطوروها وطلعوا القمر وإحنا بنرمي الصرف الصحي في النيل ونقول كان عندنا حضارة من 8000 سنة ونعيش في أمجاد الماضي , عشان كده لازم نتعلم منهم ونبقى أحسن منهم اقتصاديا وعسكريا وكمان فنيا.

وده لينك الفيديو على يوتيوب عشان اللي عايز يتفرج عليه:

http://www.youtube.com/watch?v=2_HXUhShhmY