الحاج - مايكل - ........ بقلم: الخيط

خبر وفاة مغني البوب الامريكي ( مايكل جاكسون ) كان محزن لكتير من الناس اللي حبوه وكانوا بيحبوا ستايل الاغاني بتاعته, ما أقدرش أنكر إنه كان ليه ستايل خاص باسلوبه في الرقص واسلوبه في الغنى والموسيقى بتاعة اغانيه, من وجهة نظري هو كان مميز, على الرغم من بعض التناقضات اللي في شخصيته , أهمها إنه عمل كتير من الاغاتي عن العنصرية والتفرقة بين الابيض والاسمر وهو أول واحد غير لونه, وفيه تناقضات تانية بس مش دي قضيتنا.

أذيع بعد وفاته انه أسلم, وده موضوع عمل ضجة وناس اتكلمت وناس ألفت قصص وبقى حديث الساعة والدنيا قامت ما قعدتش .

أنا لما أقول ان الشيخ محمد شعراوي او احد الانبياء مسلم, أظن ان أنا كده بأضيف للدين ده ان راجل عظيم زي الشيخ محمد شعراوي كان مسلم وبرضه لما اقول ان البابا كيرلس السادس مسيحي يبقى انا كده باضيف للدين ده, لكن لما نقول ان مايكل جاكسون مات مسيحي او مسلم او يهودي او حتى بوذي, ما أظنش ان انا كده باضيف للدين ده خصوصا ان ماحدش يعرف او انا شخصيا ما اعرفش مايكل كان ايه اسلوبه في الحياة بمعنى هل كان بتاع حريم و بيشرب خمور ومخدرات ومقضيها ولا كان راجل كويس ويعرف ربنا , لو هو كان الاولاني ما أظنش ان اي دين حيكون فخور بيه ولو كان التاني يبقى اهلا وسهلا بيه في اي دين , بس مازال مجرد شخص عادي دخل في دين معين ما أضافلوش حاجة بل بالعكس هو اكيد اللي حيستفيد من تدينه.

والله يرحمه ويحسن اليه .