كلمة مهمة و معبرة جدا ومش إهانة زي ما بعض الناس متخيلة بالعكس دي كلمة بتفكر كل واحد بحقوقه وواجباته واللي ليه واللي عليه واللي مفروض يعمله واللي مش مفروض يعمله وبتفكر كل واحد بشغله وحدوده يعني مثلا ... الطالب ماينفعش يبقى مدرس- إلا لو دخل آداب- والمدرس ماينفعش يبقى طالب - إلا طبعا لو بيمتحن الكادر- و العيان ما ينفعش يبقى طبيب حتى لو كان فعلا طبيب , لازم يعالجه طبيب تاني, و وزير النقل ما ينفعش بعد ما تحصل حادثة يموت فيها آلاف يروح يقدم استقالته وشكرا, أمال هو كان بيعمل ايه , و وزير الصحة ما ينفعش يشتغل مذيع ويطلع ويقول ان فيه عدد (كذا) مصاب بانفلونزا الخنازير وعدد (كذا) اتعالج وعدد (كذا) مات, أمال مين اللي هيشتغل وزير صحة!!؟.. هل يا ترى المذيع هو اللي هيطلع يقول ايه الاجراءات اللي اتخذتها الدولة للوقاية من مرض زي ده او غيره, وما ينفعش المسئول عن الزراعة والآفات والمبيدات الحشرية لما يتسأل عن ايه اللي اتعمل لمواجهة الطاعون اللي جاي من ليبيا يجاوب ويقول ان الناس المفروض تموت الفيران و ان عدد الفيران في مصر 80 مليون , حلو يبقى كل مواطن مصري سواء ولد او بنت او عجوز او رضيع يصحى يموتله فار على الصبح يبقى كده البلد تمام ومافهاش طاعون.
طبعا انا مقدر ان لقمة العيش صعبة وكل واحد دلوقت بيشتغل اي حاجة عشان يجيب فلوس زي المهندس اللي بيشتغل سباك او نجار والصيدلي اللي بيشتغل ميكانيكي وغيرهم كتير يعني مش بعيد انك تنزل في يوم بعد الظهر تركب تاكسي تلاقي السواق واحد من المسئولين ..... ربنا يقويهم بيتعبوا.
أنا أتمنى إني ما أكونش اتعديت حدودي وربنا يجعل كلامنا خفيف عليهم وكل واحد يلزم حدوده.
ليست هناك تعليقات:
إرسال تعليق