الأحد، 16 أغسطس، 2009

براءه الاطفال ............ بقلم الدبوس



طبعاً كلنا عارفين اد ايه الواحد بيطلع عينه فى تربيه طفل او اتنين مابالك بقى باللى بيخلف ويرمى فى الشارع وشوفوا المناظر بقى اللى منكم بينزل على رمسيس ومش رمسيس وبس ده فى كل مكان الصبح اكيد بيشوف انهم نايمين فوق بعض والعيال ايه دماغها ضايعه من اللى بقوا بيشربوه بجد براءه الاطفال دى ضاعت وكل واحد منا مسئول عن ضايعها مش عارف ادافع عن المناظر بتاعه الاطفال دول ولا ابتدى هجوم عليهم من السرقه وكل اللى بيعملوه بس برضو هما غصب عنهم الشارع علمهم كده اللى امه وابوه انفصالوا ودى مش عاوزة العيال وهو مش عاوزهم واللى ابوة مات وامه اتجوزت و العكس وحكاوى ممكن من كترها تملا كتب كتير طبعا مالهمش غير الشارع بقى بيت ليهم ومابالك بقى الاعتداءات الجنسيه اللى بيشوفها من كبير المنطقه او كبير الرصيف اللى هينام عليه بجد حرام الواحد يتجوز ويرمى عيال مالهمش ذنب فى الدنيا غير انهم جم مع ناس مش بتعرف تقدر قيمه طفل
شوف بقى فرق بسيط بين طفل الشارع وطفل المدرسه الحكوميه الواد يدخل المدرسه ملاك لا بيعرف يتكلم ولا حتى يتنفس مع حد بعد كام شهر تلاقى العيل بقى بلطجى المدراس لا بقى فيها لا تربيه ولا حتى تعليم بس اهو احسن من الرميه فى الشارع

فى نفس الوقت اللى طفل بيقابل رئيس دولته بيناقش معه ايه مشاكله فى المدرسه الواحد عاوز مانجو تبقى ضمن الوجبه المدرسيه وان زهق من البطاطس والبيتزا يا عينى عليكم يا اولاد مصر اللى لاشايف حتى رغيف فينو بايظ






الاثنين، 10 أغسطس، 2009

معركه التنوير فى زمن التكفير ...... بقلم الدبوس

الدكتور سيد القمنى ...............سيد محمد القمني كاتب أكاديمي مثير للجدل من مصر حاصل على الدكتوراه في تاريخ علم الاجتماع الديني، من مواليد 13 مارس 1947 بمدينة الواسطى في محافظة بني سويف ، معظم أعماله الأكاديمية تناولت منطقة شائكة في التاريخ الإسلامي. البعض يعتبره باحثاً في التاريخ الإسلامي من وجهة نظر ماركسية والبعض الآخر يعتبره صاحب أفكار اتسمت بالجرأة في تصديه للفكر الذي تؤمن به جماعات الإسلام السياسي، بينما يعتبر السيد القمني نفسه و على لسانه من على قناة الجزيرة الفضائية إنه إنسان يتبع فكر المعتزلة....

بعد حصوله على جائزه الدوله التقديريه والتى تصل قيمتها إلى 200 ألف جنيه ، أصبح المفكر الاسلامى مصدر للجدل خاصه بعد نشراراء دينيه تعارض الاسلام ورفضه تطبيق الشريعيه
طبعا كل الكلام للدكتور لن يستطيع تغير شىء فهو من وجهه نظرى الشخصيه انه مفكر وصاحب راى ومذهب وله كل التقدير والاحترام لكن كل ما يكون فى مفكر وحد بيقول رايه هنقول عليه انه خارج عن الدين يبقى مش هايكون فى حد بيفكر من الاساس امال فين حريه الراى اللى الناس بتتطلع تقول وتعيد وتزيد عنها فين الحريه دى ده حتى جبهه علماء الازهر عملوا هجوم حاد على وزير الثقافه فاروق حسنى ، أولا الجائزه دى بيتم التصويت عليها فى سريه كامله يعنى محدش يعرف مين رشح مين بس برضوا معناها ان أصبح فى ناس متنورين وواضح كمان ان اللى بيهاجموه مش عارفين يردوا غير باهدار الدم الراجل مش كافر الراجل بيفكر ومش عيب اننا نفكر اللى غايظى أن اتقدم فيه بلاغ للنائب العام مقدم من محمد عنانى محمد حارس خاص للوزراء سابقاً يحمل رقم 12557 ضد سيد القمنى طالب فيه بإسقاط الجنسيه المصريه وسحب الجائزه ، طبعا ده غير التهديدات اللى الراجل عايش فيها الامر اللى أوصل الامر فى خطاب مباشر من الدكتوره إيزيس القمنى تناشد الرئيس لحمايتهم

نهيب بسيادتكم أن تتدخلوا لإنقاذنا من تهديدات التيارات الراديكالية الإسلامية التي أهدرت دم والدنا، وتواصل التحريض على قتله وقتلنا تحت سمع وبصر الجميع سواء عبر منابر المساجد أو الفضائيات التي يمولها هؤلاء الذين يستغلون الدين لخدمة أهدافهم السياسية، لا لشيء إلا لعجزهم عن مقارعته بالحجة والرأي وذلك منذ حصوله على جائزة الدولة التقديرية، الأمر الذي أفقدهم الصواب تماما لاعتقادهم بتبني الدولة للفكر العلماني الذي جعلوه مرادفاً للكفر والإلحاد زوراً وبهتاناً

http://www.elaph.com/Web/AkhbarKhasa/2009/7/464805.htm



بجد مش بتمنى حاجه اكتر من خلق مكان للحوار بين المفكرين واللى بيتنقدوهم ولى رجاء شخصى كنت قريت انتقاد لكتاب للدكتور سيد القمنى واللى كاتب النقد لا يدل على أكتر انه لا علم له بالكتاب أساسا هو مقراش الكتاب وبيتكلم مش عارف ازاى

الأحد، 9 أغسطس، 2009

مئة خطوة الى الوراء ... بقلم: المقص


كما تعودنا على القرارات الغريبة جاء قرار الجهاز القومي لتنظيم الاتصالات بتطبيق سياسة الاستخدام العادل للانترنت - و للعلم فقط انها ليست بدعه خاصه بالجهاز فهي متبعة في كثير من دول العالم و ان كان بشكل عادل فعلاً - ليشكل صدمة للكثيرين الذين تصوروا ان قرار تخفيض اسعار الانترنت قبل شهرين جاء على سبيل التخفيف عن المواطن المصري.
و اولا لابد ان نتكلم عن سياسة الاستخدام العادل .. هي في اساسها نظام يتيح للجميع التمتع بقدرات الشبكة بدون استحواذ احدهم على قدر كبير على حساب المشتركين الاخرين
في سياسة الاستخدام العادل تكون الحدود 65% من اجمالي الطاقة القصوي للخط اي ان اشتراك بسرعة 512KB/S يكون الحدود له حوالي 74GB و ليس 25 كما ينص القرار .
طبعا هذا في السياسة العادلة كما انه لا يجوز ابدا تجاوز هذه الحدود و دفع مقابل الاستخدام الزياده - طبعا ده مش موجود في القرار حيث انه من الممكن تجاوز هذا الحد مع دفع 10 جـ لكل 1 GB زائد عن الحد المقرر.
لست اعلم لماذا يصدر جهاز – مثل جهاز تنظيم الاتصالات - مثل هذا القرار مع انه المفروض انه يقوم بحماية المستهلك و ليس حماية شركات الاتصالات من المستهلك.
فهذا القرار لايهدف الي اي شيء سوى تعظيم ارباح الشركات و تقليل استخدام الانترنت الامر الذي ينظر اليه على انه عودة للوراء و تراجع كبير في النظام المعرفي.
و إذا كان الهدف منه هو ضرب الوصلات غير الشرعية للانترنت - و هذا محتمل – فلا باس و لكن ان يتم حساب الاستخدام العادل فعلاً فانا مثلا امتلك 3 اجهزة كمبيوتر في المنزل فهل يفترض بي استخدام ثلاث خطوط تليفون منفصلة لكل جهاز، ام على الدفع 10 جـ مقابل كل جيجا زائد عن الحد.
طبعا هذا الكلام غير معقول بالمرة و إذا استمر تفعيل هذا القرار فسوف نشعر يوم بعد يوم بمساويء هذا القرار في ظل ان استخدام الانترنت يزداد كل يوم.

السبت، 8 أغسطس، 2009

طول بالك ............ بقلم الدبوس



طول بالك كلمه بنسمعها كل يوم بس بالذات من الموظفين الحكوميين اجارك الله لم يبقى ليك ورقه عاوز تخلصها وطبعا مش هتعرف بسهوله مش يا استاذى لا سمح الله الروتين يارتها تيجى على قد الروتين تجى تقف قدام الموظف من دول متعصب وكانك بتشحت من اتنين جنيه فكه ومابالك لو كانت دى موظفه مش راجل تلاقيها نازله من بيتها جوزها ضربها تيجى بقى تتطلع قرفها على خلق الله علشان ورقه ده يبعتك للتانى والتانى يوديك اخر الدنيا وهاتلى دمغه من هناك وترجع تانى تقف الطابور من الاول طبعا انت عبيط هو انت هتاخد حقك وحق غيرك هيجرى ايه لو الناس تشتغل بضمير وبلاش حكاوى حديث شوفته بعينى فى احد الاماكن الحكوميه المكتب كله موظفات والناس زحمه وهما ياريت بيشتغلوا الهوانم بيحكوا على أنواع القماش طب هو الموضوع الهام للغايه ده مكانش ممكن يتاجل لغايه ما الناس يمشوا وفى الاخر لو كلمت حد باسلوب حاسم هتلاقى ايه محاضره فى الادب والاخلاق وانه مش شغال عند سعادتك شوف بقى لو كان موظف لطيف بقى من بتوع فلوس اللى تتحط فى الدرج اللى جنبه تلاقى نفسك باشا لا وايه ممكن يقول عليك قريبه كمان بجد الموضوع بقى متعب جدا وكل يوم يبقى الوضع اسوا

الخميس، 6 أغسطس، 2009

فتوى تجيز الزواج عبر الإنترنت .....بقلم الدبوس


فتوى تجيز الزواج عبر الإنترنت
أجاز رئيس قسم الفقه المقارن في المعهد العالي للقضاء السعودي عبد الرحمن السند عقد النكاح أو الطلاق عبر الإنترنت كتابة أو مشافهة.







لقراءه الخبر

http://www.aljazeera.net/NR/exeres/C2DBF8A3-8DA9-4683-A72B-B7FCC29661FD.htm



هو الموضوع طبعاً غريب لانه كده فقد جوانب كتير اموت واعرف تبقى مراته ازاى مش عارف طب مانا كده ممكن اتجوز واطلق كتير مين رقيبى ولا حتى ايه حقوقها ولا فين حقى انا يبقى ده اسمه جواز طب ماهى تبقى المزه بتاعتى وخلاص هى هتطمع فى ايه تانى بس الغريب ان قال الفتوى دى من رئيس قسم الفقه المقارن في المعهد العالي للقضاء السعودي يعنى الراجل المفروض دارس وعلى علم طب بالذمه ساب ايه لينا ولا عارفين ولا عندنا علم

بس برضوا نقول الله أعلم



الثلاثاء، 4 أغسطس، 2009

انت لست الله ولا نائبه ..!! بقلم: المقص


من كتر الاخبار العجيبه اللي بسمعها اليومين دول مبقتش عارف اضحك ولا ابكي ، بجد شر البلية ما يضحك. الاول الخبر الهلامي بتاع قرار محكمة سودانية بجلد الصحفية لبنى احمد الحسين 40 جلده لارتكابها فعل فاضح ، اللي هو طبعا زي ما عرفت لبسها بنطلون في الشارع - شوف البجاحه يا اخي - بنطلون في الشارع كده عيني عينك - مفيش ادب ولا اختشى ... ده طبعا على حسب ماده(151) في القانون السوداني الهلامي الجنائي " من يأتي في مكان عام فعلاً أو سلوكاً فاضحاً أو مخلاً بالآداب العامة أو يتزيا بزي فاضح أو مخل بالآداب العامة يسبب مضايقة للشعور العام، يعاقب بالجلد بما لا يجاوز أربعين جلدة أو بالغرامة أو بالعقوبتين معاً "
لتفاصيل الخبر
طبعا دي بركات الاخوة بتوع الدولة الدينية

الخبر التاني بتاع هبه نجيب البنت المصرية اللي عايشه مع باباها في جده و مانعها من انها تنزل مصر رغم ان عندها 27 سنة بس طبعا القوانين السعوديه بترغم اي واحده ان يكون معاها محرم و يكون بموافقت كافيلها - على اساس انها معزه لازم يكون ليها صاحب - عمرك شفت معزه مسافرة لوحده
لتفاصيل الخبر

الخبر التالت من عند حكيم النيل بقول ان الطرق الصوفية نزلوا بيان رد على محاولة الحكومة الغاء بعض الموالد او محاولة تقنينها بان نكسة 67 جائت نتيجة الغاء مولد ام هاشم قبل الحرب بسنة - طب و غرق العبارة كان بسبب انهي مولد - و طبعا طز في كل الاسباب المنطقية للموضوع. الولي قال كلمته خلاص.

الخبر الرابع للبابا شنودة حيث قال في تصريح صحفي ان اغلب المصريين يؤيدون ترشيح جمال مبا
رك للرئاسة - مش عارف ده تبعاً لانهي احصاء - و لما سؤل على اون تي على رايه الشخصي قال: «لما ييجى الوقت المناسب أنا وباقى الأقباط سوف نقول رأينا، بدلا من أن أقول رأياً، ويبدأوا فى الهجوم عليه لأنه صادر من الكنيسة». كما اضاف انه لايوجد من يرشح نفسه امامه.
انا مش عارف ايه دخل رجال الدين بالسياسة. و ليه اساسا يتسالوا على حاجه مش اختصاصهم.

يعني ليه نجيب فضيلة المفتي او البابا و نساله على موضوع الرئاسة نجيبهم علشان قضايا فقهية دينية و بس. يعني ينفع اجيب مهندس علشان اساله على علاج لانفلونزا الطيور - طبعا لا - يبقى ليه كل يوم الاقي قناة مستضيفة واحد من رجال الدين و هرياه اسئله في السياسة و الاقتصاد كأن الوحي هينزل عليه و هو قاعد و يجيب الحل لكل مشكلاتنا.

انا حاسس دلوقت بحالة من الذهول كل الاخبار دي عليا مره واحده ... لا كتير كده