الخميس، 3 يونيو، 2010

بحبك ومقدرش اعيش بدونك .....بقلم الدبوس



كلام فى سركم العيال تعبت والدنيا ماشيه طاحونه بتتطحن الكل تحت رجليها لا حد مرتاح ولا شايف راحه من الاول واحد زينه شباب جيله مكملش 30 سنه من عمره حب ولا هاتقولوا الحب حرام كمان راح لبنت الحلال اللى قلبه اختارها قالها تقبلينى سكتت ولا قالت اه ولا لا ظروفى وحشه يابنت الحلال تستحملينى استحملت يوم وراء يوم ومفيش جديد الواد غلبان ومش عارف يعمل ايه والحبيبه اللى علشانها حب الدنيا تعبت ومش قادره تستحمل قالتله نسيب بعض كسرت قلبه مش عارف يعيش من غيره قام راح قرر يسيب الدنيا من غيرما يقول لحد لا سلام ولا كلام راح ابن الناس جاب حبل ومكان المقابلات مع الحبيبه قرر هناك يودع الدنيا وربط الحبل ورمى نفسه ودى نهايته ............

طب ليه يابنى كده هان عليك حبك هانت عليك امك هان عليك الناس اللى بيحبوك


............ لو كان هيرد ممكن يكون رده ................... هانت عليا الدنيا اللى فيها ناس عايشه وناس مش عايشه ...........

ناس بتادى ادوار وناس بتتفرج وناس لاعارفه تعمل دور ولا عارفه تتفرج ............ وانا كنت من النوع اللى لا عارف يتفرج ولا حتى يعمل دور .......... حرام عليك يا زمن جيت الدنيا ومشيت ولا حد حس ولا حد عرف ولا حد هيعرف انى كنت هنا ... عملت زى الهوا لا حد يعرف يشوفه ولا يحس بوجوده ........

فوقى يادنيا قبل ما الكل يكون منتحرا من الدنيا ....

تعليق : الناس اللى شافت وسمعت عن الحكايه بتشتم وتدعى على البنت اللى سابت حبيبها وبعدين ياناس مش انتم بردوا اللى لو شوفتم البنت مع واحد مالوش صله قرابه بينهم بتقولوا انها مش متربيه وان لو ليها حد حكمها مكنتش مشيت مع حد لا هو خطبيها ولا يقرب ليها اتقوا الله لا اب ولا ام ولا الناس هيبسبوها فى حالها وهيقولوا عليها انها متحرره يعنى من الاخر صايعه سيبوا بعض كل واحد فى حاله شوفوا همكم بلاش تشمتوا فى مصايب غيركم

صبر يارب اهل المنتحر
نقلا عن التحقيقات المبدئيه للحادث

الثلاثاء، 1 يونيو، 2010

دوله الحزب الوطنى بدل دوله مصر العربيه بقلم الدبوس


السلام ليكم يا اهل وشعب الدوله الجديده طبعا كنا منتظرين انتخابات مجلس الشورى بفارغ الصبر نشوف الديموقراطيه المطبقه بس للاسف انا اتصدمت من اللى بيحصل اولا منع الشهر العقارى عن انه يستلم اى اوراق تتسجل فيها لمصلحه اى حزب انه يكون فى اللحان مع المرشحين بتوعه 13 حزب فى مصر والنتيجه اصبحت محسومه لصالح الدوله الجديده اى دوله الحزب الوطنى المصطلح ده انا مش جايبه من عندى بس ده بقى راى متداول بين الناس والناشطين السياسين فى اللجان الانتخابيه انهارده منع ناس من الانتخاب والسيناريو اللى فات قيام المرشحين ان كانوا من اى حزب او مستقلين بالتنازل لصالح الحزب الوطنى طب اذا كان الانتخابات فى مجلس الشورى كده امال فى اللى جاى هيكون ايه وده تقرير ادخلوا وشوفوا بعينكم




السبت، 22 مايو، 2010

فندق رصيف مجلس الشعب ------- بقلم الدبوس


طبعا شوفنا الفندق اللى بقى معظمنا نزل فيه او اى قناه اخباريه جابته متهيقالى لو قعد نعد كام اضراب وكام اعتصام عليه من السنه اللى فاتت مثلا هنعدى رقم قياسى بس ليه الحكومه متجيش غير كده يعنى حق الناس الغلابه دى ده فى ناس مش لاقيه تاكل عيالها ولا عارفين يعيشوا ده حرام بجد اللى حرق دمى ان الاضراب الاخير الناس عملت كل حاجه ولا فى استجابه لعمال شركتى «النوبارية للهندسة الزراعية» و«المعدات التليفونية" وايه بقى رصيف مجلس الشورى اللى فيه العمال الشركة الاقتصادية للتنمية الصناعية «أمونسيتو» المملوكة لرجل الأعمال الهارب عادل اغا ليواصلوا اعتصامهم لليوم الرابع عشر الناس عملت اضراب والجو الحراره عاليه وعيطوابدموع عينهم وخلعوا هدومهم يعملوا ايه طيب زمان غنى عمرو دياب رصيف نمره خمسه مكانش عارف ساعتها ان بقى عندنا اشهر من الرصيف بتاعه بقى رصيفا مجلس الشعب والشورى والتهديد اللى هما فاكرينه حل انهم غدا الاحد يتوجهوا لقصر القبه يمكن يلاقوا حل ربنا يساعدكم وتاخدوا حقوقكم بقى بالذمه الحل فين ولا عند مين الناس بتدعى على الحكومه وعلى النظام هل ياترى لو النظام ده بقى فى ايد حد تانى هيكون افضل ولا دعوة للتغيير على ايد نظام تانى يمكن يكون اسوا ويمكن يكون افضل اللهم اكفينا شر المستخبى

الأربعاء، 17 فبراير، 2010

ازمه منتصف العمر ,..... بقلم الدبوس


طبعا يا صحابى الحلوين مستغربين من العنوان بس دى الحقيقه المره لالا نقول السوداء طبقا لحالتها زمان اللى هو كان امبارح كانت الازمه بتكون للناس اللى فى الاربعينات لكن دلوقتى بقيت فى العشرين تحت شويه فوق شويه بس كلها شغال العيل من دول ياخويا لسه مطلعش من البيضه وعنده اكتئاب اعمل ايه اذا كنت انا كمان عندى اكتئاب واحباط كمان بس مش عارف اعمل ايه كل يوم اقوم من النوم اغسل وشى اقول يمكن الاكتئاب يروح مبيروحش اغسل سنانى اقوال هيروح مبيروحش اتصدم بقى وانزل اقعد فى المواصلات كام ساعه طبعا لا هيروح ولا هيسبنى ده بقى ضلى مطرح ماروح يروح معايا اقواله عيب ياعم اكتئاب البيت ليه حرمه ولا بيهمه اعمل ايه خلاص بقيت انام واسيب جنبى حته فاضيه مش بيقول اكرام الضيف وانا كرمته على الاخر سبتله نفسى لا واللى زاد وغطى افتح التليفزيون الاقى برنامج جايب عن اكتئاب الشباب كنت هفطس من الضحك واشك اللى جنبى لما بيقول ان الوزير الفلانى قدوه للشباب وهو فى الاربعينات يعنى ياخبتك يا دبوس ياللى لسه مش اتودلت اساسا لما يكون بتاع الاربعين شاب ابقى انا ايه وانا لسه موصلتش لل25 يا حوستك يا دبوس ياللى اخرك تتشبك فى بكره خيط وتقعد على الرف لحد ما يجى حد يعوزك لا وايه تانى كان هيثم دبور موجود هو عنده احباط لوحده وعامل يضحك وانا زى الاهبل بضحك عليه عارفين ليه علشان انا لسه معملتش اى حاجه لا لاقى شغل ولا عارف اتهبب انى اتشبك فى قميص حد اساعده لا وايه اسمى دبوس ياخبتى وايه من كام يوم اتنين انتحروا على المترو بتاع شبرا العيال دى طبعا الله يرحمها ويصبر اهليهم بس مش كانوا يستنونا نعمل حفله انتحار جماعى .... لا واللى اثر فيا ان رئيس جهاز المترو يقولك ايه يادبوس هما معندهمش غير المترو مافى النيل ولا البرج ههههههههههههههه طبعا الراجل عنده حق اهو بيوفر وسيله انتحار بعيده عنه مش زعلان على الشباب اللى ماتت مش كان ممكن ان يكون ابنك ده او حد تعرفه اعطينا الصبر يارب الواحد يغير اسمه من دبوس الى مكتئب افندى وعجبى على الدنيا

الأربعاء، 11 نوفمبر، 2009

كلها موته ولا اكتر

طبعا العنوان انا عارف انه رخم بس هى دى الحقيقه علشان بقى عندنا قاتل ماجور بيقتلنا واحنا مش شايفنه ؤاحكلكم الحكايه من طقطق لسلاموا عليكم البدايه انى حنين حبتين وشلت عيل صغير كان العيل ده سخن وانا معرفش المهم بلاش لك وعجن انا تعبت وبقيت كل يوم عند دكتور شكل وكل واحد عامل يفتى والعبد لله عامل زى معمل التجارب ولا حتى حصلت فار مسلوخ اخلص بس بقالى تعبان بقالى كتير فكرت قولت قوم روح على مستشفى خاص اهو هين قرشك ولا تهين نفسك يا دبوس وكان عندى ضيق فى التنفس وطبعا مع باقى الاعراض بتاعه الانفلونزا روحت ولا مستشفى رضيت تدخلنى كله مش مجهز وخايفين يتعدوا مع ان هما مش عارفين عندى ايه روحت قولت اللى ضهر ميضربش على .... معايا وسطه دكتور حبيبى اخدنى علشان يكشفلى فى مستشفى حكومى طبعا كسر حاجز الانتظار دخلنى الصراحه قبلهم ادخل الاقيلك دكتور للرجله ودكتوره للستات والمصيبه منقبه طيب الدكتوره دى بتكشف على ستات ويمكن تكون حامله للمرض تعدى ستاتنا ليه دى تانيها نجى بقى للمر الاكبر ادخل للراجل مش بيهون عليه يكشف انت حاسس بايه قولتله اللى حاسس بيه وعنها كتب ادويه وجابلى من الاخر قالى فى قرار من وزاره الصحه بيقول المصل للحجاج والناس الجامده طبعا الغلبان يروح احسن وبعدين التامافلو للى خلاص بيودعوا الدنيا قولتله طيب اعملى عينه قالى روح ولو رجعت دم تعال اعملك مسحه ونحجزك ده كده وليا ظهر امال يا عينى لو تعبت واللى مودنى مش فاضى يجلى اعمل ايه اموت طيب وصحيح كلها موته ولا اكتر وبعيد عنكم خلاص اتهريت ادويه وحقن وخلصت خلاص طيب مصيرنا ايه الفتره اللى جايه انا مش بقومها بس الدنيا قايمه فعلا

الأربعاء، 21 أكتوبر، 2009

تقليعات الموضه لشتاء 2009 داخل الجامعات بقلم الدبوس


الصوره دى مش حايبها من موقع دى دى صوره حيه وحقيقه لاخر صيحات الدكاتره فى الجامعات المصريه الدكتوره رشا عبد الحى دكتوره احصاء وتامين بجامعه حلوان خايفه على صحتها فى وسط حشد من الطلبه والطالبات مش خوفا عليهم هما لا سمح الله بس انتم عارفين هواجس الامراض بقى الدكتوره رفضت اعطاء المحاضره تخيلوا مش علشان الطلبه مزجعه ولا حاجه علشان بعضهم مش لابسين ماسك طبى ده مشهد صغير من اللى بيحصل لاولادنا فى المدارس والجامعات كنا فاكرين ان العيال هى اللى مش عارفه مصلحتها فين طلع ان غصب عنهم وهما مالهمش دعوة وان الدكاتره والمدرسين هما السبب ده على اساس ان الواقى ده بياخد ثانى اكسيد الكربون اللى خارج من نفس كل واحد فيهم وبيديهم اكسجين نقى من الناحيه التانيه ماعلينا صحيح الفاضى يعمل قاضى بس انا عاوز اقولها اتقى ربنا فى ولادنا يا دكتوره

الثلاثاء، 20 أكتوبر، 2009

وبعدين .............. بقلم الدبوس

وبعدين دى كلمه كبيره قوى محدش عارف قيمتها صح كل يوم بيعدى وبيجى غيره على الصبح كده بنقول وبعدين بس وبعدين فى ايه بالظبط


1 - وبعدين فى الهم والمشاكل
2 - وبعدين فى التلوث اللى فى كل مكان
3 - وبعدين فى الامراض اللى مش عارفين نلاحق هما نخلص من حاجه تتطلع التانيه
4 - وبعدين فى غلاء الاسعار وبقيتنا بنشحت من تانى يوم فى الشهر بعد ما طبعا ندفع الفواتير بتاعه الحكومه
5 - وبعدين فى الزحمه
6 - وبعدين فى الناس اللى مش مستحمله بعضها
7 - وبعدين فى ايه ولا فى ايه
عن نفسى تعبت من كلمه وبعدين وانام واقول بكره هايتعدل الحال وادينى قربت اموت ولا هشوف الحال معدول بعنيا

تعليق بس شوفته بنفسى هيئه وزاره الصحه بتحاول توعى الناس من العدوى من انفلونزا الخنازير بتقول التهويه وعدم الاقتراب من الاخر خلى بس الوزير ينزل المترو يشوف بعينه لا تهويه ولا كهرباء ولا حتى قطارات المترو شغاله فى مواعيد المنظر لا نحسد عليه مش بقول كده وبس ده لو كان واحد مصاب فى العربيه نتاكد انه نقل العدوى على الاقل 3 او 4 اشخاص على الاقل اللى بيحصل ده حرام
وبعدين نعمل ايه


والاخر طب وبعدين .................